ವಿಘ್ನೇಶ್ವರನ ವಿಸರ್ಜನೆ

!!ಜ್ಞಾನಾರ್ಪಣಮಸ್ತು!!

[
ಕಳೆದ ಸಲ ನಮ್ಮೂರಿನಲ್ಲಿ ನಡೆದ ಗಣಪನ ವಿಸರ್ಜನೆ ಕುರಿತು ಬರೆದಿದ್ದೆ.. ಇಂದು ಗಣಪತಿ ಕೂರಿಸುವುದರಲ್ಲಿ ನನಗಿರುವ ಅನುಭವದ ಬಗ್ಗೆ ಬರೀತಿದೀನಿ..]

ಮೊದಲನೆಯದಾಗಿ ಸರ್ವರಿಗೂ ಹಬ್ಬದ ಶುಭಾಷಯಗಳು...

ಗೌರಿ-ಗಣೇಶನ ಹಬ್ಬ ಬಂದಿದೆ,ಹಬ್ಬದ ಸಡಗರ ಸಂಭ್ರಮದ ಕುರಿತು ಹೇಳಬೇಕಿಲ್ಲವೆನಿಸುತ್ತದೆ.
ಗೌರಿ ಹಬ್ಬ ಸಾಮಾನ್ಯವಾಗಿ ಹೆಣ್ಮಕ್ಕಳಿಗಾದ್ರೂ ಗಣಪತಿ ಕೂರಿಸಿ ವಿಜೃಂಭಿಸುವುದು ಗಂಡ್ಮಕ್ಕಳಿಗೆ ಮೀಸಲಾದ ಕೆಲಸವಲ್ಲಲೇ.
ನಾ ಕಂಡಂತೆ ಹೇಳಬೇಕಂದ್ರೆ: ನಮ್ಮ ಹಳ್ಳಿಯಲ್ಲಿ ನಮ್ ಏರಿಯಾ ಹುಡುಗರ ವರ್ಸೇನೆ ಬೇರೆ,ಹಿಂದಿನಿಂದಲೂ ಪೋಲಿ ಪುಂಡಾಟಿಕೆಗಳಿಗೆ ಹೆಸರಾದ ಹುಡುಗರು ಗಣಪತಿ ಹಬ್ಬ ಬಂತಂದ್ರೆ ತುಂಬಾ ಬ್ಯುಸಿಯಾಗಿಬಿಡ್ತಾರೆ,ಬೇರೆ ಏರಿಯಾ ಹುಡುಗರಿಗಿಂತ ಜೋರಾಗಿ ಗಣಪತಿ ಕೂರಿಸಬೇಕು ಅಂತ ಯೋಜನೆ ಹಾಕೊಂಡ್ರು ಅದನ್ನ ಸಫಲ ಮಾಡೋದ್ರಲ್ಲಿ ಎಲ್ರೂ ಸೋಮಾರಿಗಳೆ.
ನಾನು ಚಿಕ್ಕವನಾಗಿದ್ದಾಗ ಹಬ್ಬದ ದಿನದಂದು ಊರಲ್ಲಿ ತಂದಿರುವ ಗಣಪತಿಗಳನ್ನು ನೋಡೋದ್ರಲ್ಲೆ ತೃಪ್ತಿ ಪಡ್ತಿದ್ದೆ.
ನಾನು ಸ್ಕೂಲಿಗೆ ಸೇರಿದ್ದ ವಯಸ್ಸಿನಲ್ಲಿ ನಾನು ಕೂಡ ಗಣಪತಿ ಕೂರಿಸಲು ನನ್ನ ಕೈಲಾದಷ್ಟು ಹಣ ನೀಡಿ ಅವರೊಳಗೊಬ್ಬನಾಗಿರುತ್ತಿದ್ದೆ.
ಆಗ ಗಣಪತಿ ಕಾಯಲು ಶಾಲೆಗೆ ಚಕ್ಕರ್ ಹಾಕ್ತಿದ್ದೆ,ರಾತ್ರಿ ವೇಳೆ ಗಣಪತಿ ಇಟ್ಟಿದ್ದ ಕಡೆಯೇ ಹುಡುಗರು ಮಲಗೋದು ರೂಢಿ,ಅವರೊಡನೆ ಮಲಗಲು ನನ್ನ ಮನೆಯವರು ಒಪ್ಪದಿದ್ದಾಗ ತುಂಬಾ ಅಳ್ತಿದ್ದೆ,ಗಣಪತಿ ಎಡೆಗೆ ತಿಂಡಿ ಮಾಡಿಕೊಡಿರೆಂದು ನಮ್ಮ ಮನೆಯವರನ್ನು ಪೀಡಿಸಿ ಮಾಡಿಸಿಕೊಳ್ಳುತ್ತಿದ್ದೆ.
ಅಕ್ಕಪಕ್ಕದೂರಿಗಳಿಗೆ ಹೋಗಿ ಅಲ್ಲಿಟ್ಟಿರುವ ಗಣಪತಿಗಳನ್ನು ನೋಡಿಬರೋದು ಒಂದು ಹವ್ಯಾಸವಾಗಿತ್ತು/ದೆ.
ಗಣಪತಿ ವಿಸರ್ಜನೆ ಮಾಡುವ ದಿನದಂದು ಹಬ್ಬವೋ ಹಬ್ಬ.. ಮೊದಲೇ ಶಾಲೆಗೆ ರಜ ಹಾಕಿ, ಸಂಜೆ ಆದಂತೆ ಮನೆಯಲ್ಲಿರುವ ಯಾವುದಾದರೂ ಹಳೆ ಬಟ್ಟೆ ಹಾಕಿಕೊಂಡು ಅಂಗಡಿಗಳಲ್ಲಿ ಬಣ್ಣ ತಕ್ಕೊಂಡು ವಿಸ್ಕಿ ಬಾಟಲಿಗೆ ನೀರಿನ ಜೊತೆ ಬಣ್ಣ ತುಂಬಿ ಇಟ್ಟುಕೊಂಡಿರುತ್ತಿದ್ದೆ, ಮೆರವಣಿಗೆ ಹೊರಡುವಾಗ ಬಣ್ಣ ಹಾಕುವುದು,ನಮಗೆ ಹಾಕಲು ಬಂದವರಿಂದ ತಪ್ಪಿಸಿಕೊಳ್ಳುವುದು ನಮ್ಮ ಕೆಲಸವಾಗಿತ್ತು.. ವಿಸರ್ಜನೆ ಮುಗಿಸಿ ಮನೆಗೆ ಬಂದಾಗ ಮನೆಯಲ್ಲಿ ಬೈಗುಳವೂ ಜೋರಾಗಿಯೇ ಇರುತ್ತಿತ್ತು.. ತಲೆ ತುಂಬಾ ಬಣ್ಣ ತುಂಬಿಕೊಂಡಿರುತ್ತಿತ್ತು ,ಸ್ನಾನ ಮಾಡಲು ಕೂತು ನೀರು ಹಾಕಿಕೊಂಡರೆ ಬಣ್ಣದ ನದಿಯೇ ಹರಿಯುತ್ತಿತ್ತು.. ನಮ್ಮ ಮೈ ಸಂಪೂರ್ಣ ಬಣ್ಣಮುಕ್ತವಾಗಲು ಒಂದು ವಾರವೇ ಬೇಕಿರುತ್ತಿತ್ತು..
ದೊಡ್ಡವನಾದಂತೆ ಗಣಪತಿ ಕೂರಿಸುವ ಕಡೆಗಿನ ಒಲವು ಹೊಸ ರೀತಿ ಅರ್ಥ ಪಡೆದುಕೊಂಡಿತು.

ಈಗ ನಮ್ ಏರಿಯಾಗೆ ನಾವೇ ದೊಡ್ಡ ಹುಡುಗರು,ನಮ್ ಏರಿಯಾ/ಏರಿಯಾದ ಜನರು ಬದಲಾಗಿದ್ದಾರೆ.
ಹಬ್ಬಕ್ಕೆ ಇನ್ನೂ ಒಂದು ವಾರ ಇರುವಂತೆ ತಲಾ ಇಷ್ಟಿಷ್ಟು ಕೊಡಬೇಕೆಂದು ಹೇಳಲಾಗುತ್ತದೆ,ಕೆಲವು ಯಜಮಾನರೊಡನೆ ನಮ್ ಹುಡುಗರಿಗೆ ಕೆಲವು ವಿಷಯಗಳಿಗೆ ವೈಮನಸ್ಯವಿದೆ, ಆ ಕೋಪವನ್ನು ಗಣಪತಿ ಕೂರಿಸಲು ಹಣ ಪಡೆಯಲು ಹೋದಾಗ ಅವರ ಹತ್ತಿರ
ಹೆಚ್ಚು ಹಣ ಕೀಳುತ್ತೇವೆ,ನಮ್ಮ ಪುಂಡಾಟಿಕೆ ಅರಿತ ಜನರು ನಮ್ಮ ಜೊತೆ ವಿರೋಧ ಕಟ್ಟಿಕೊಳ್ಳಲಿಚ್ಛಿಸದೆ ಕೇಳಿದಷ್ಟನ್ನೆ ಕೊಟ್ಟುಬಿಡುತ್ತಾರೆ.
ಪುಂಡಾಟಿಕೆಯನ್ನೆ ಇಷ್ಟಪಡುವ ನಮ್ ಹುಡುಗರು ರಸ್ತೆಯಲ್ಲೆ ಚಪ್ಪರ ಹಾಕಿ ಹಾದಿಯನ್ನೇ ಬದಲಾಯಿಸುತ್ತಾರೆ, ಚಪ್ಪರ ಹಾಕಲು ಸಿಕ್ಕಸಿಕ್ಕವರ ಮರ ಏರಿ ತೆಂಗಿನಗರಿ ತಂದು,ಹೇಳದೆ ಕೇಳದೆ ಗಳಗಳು ಕಂಡಲ್ಲಿ ಹೊತ್ತುತಂದು ಪುಂಡಾಟಿಕೆ ಮೆರೆಯುತ್ತಾರೆ.
ಗಣಪನ ವಿಸರ್ಜನೆಯ ದಿನ ಬೀದಿಬೀದಿಗಳಲ್ಲಿ ಕಟ್ಟಿರುವ ದನಕರುಗಳು ಬೆದರುತ್ತವೆ ಪಟಾಕಿ ಸಿಡಿಸಬೇಡಿ ಎಂದರೂ ಜಗಳ ಮಾಡುತ್ತಲೇ ಪಟಾಕಿ ಸಿಡಿಸುತ್ತಾರೆ. ಸಿಕ್ಕಸಿಕ್ಕವರಿಗೆ ಬೇಡವೆಂದರೂ ಬಣ್ಣ ಹಾಕಿ ಕಿರಿಕ್ ತೆಗೆಯುತ್ತಾರೆ. ಈ ಗುಂಪಲ್ಲಿ ಅಂದೇ ಎಣ್ಣೆ ಕುಡಿದು
ಟೈಟಾಗಿ ಕುಣಿದು ಕಿರುಚಾಡುವವರೂ ಇದ್ದಾರೆ.
ಕೆಲವು ಮನೆಯವರು ಈ ಗುಂಪಿನ ಜೊತೆಯಲ್ಲಿ ತಮ್ಮ ಹುಡುಗರು ಹೋದಾರೆಂದು ಹೆದರಿ
ತಮ್ಮವರನ್ನು ಹುಡುಕುತ್ತಾರೆ. ನಾವು ವಿಸರ್ಜನೆಗೆ ಹೋದಾಗ ಅನಾಹುತ ಆಗಬಹುದೆಂದು ಹೆದರಿ ಹಲವಾರು ಮುನ್ನೆಚ್ಚರಿಕೆ ನೀಡಿ ಜೋಪಾನವೆಂದು ಹೇಳುತ್ತಾರೆ..
ಈ ಗಲಾಟೆ ಗದ್ದಲ ಬೇಡ. ಇನ್ಮುಂದೆ ಗಣೇಶ ಕೂರಿಸೋದು ಬೇಡ,ಮುಂದಿನ ವರ್ಷದಿಂದ ನಮ್ ಏರಿಯಾದ ಚಿಕ್ಕವರಿಗೆ ಮುಂದಾಳತ್ವ ನೀಡಿ ನಾವು ಹಣ ನೀಡಿ ಸುಮ್ಮನಿರೋಣ ಎಂದುಕೊಂಡರೂ,ಬೇರೆ ಏರಿಯಾದ ಮೇಲೆ ಪೈಪೋಟಿ ಸಾಧಿಸಲು ನಾವೇ ಇರಬೇಕು ಎಂದುಕೊಂಡು ನಾವೇ ಕೂರಿಸುತ್ತೇವೆ.
ಯಾವ ವರ್ಷವೂ ನಮ್ ಊರಲ್ಲಿ ಗಣಪತಿ ಹಬ್ಬಕ್ಕೆ ಕಟ್-ಔಟ್ ಗಳನ್ನೂ ಪ್ರಿಂಟ್ ಹಾಕಿಸಿರಲಿಲ್ಲ.. ಈ ಸಲ ಕೆಳಗಿನ ಏರಿಯಾದವರು ಪ್ರಿಂಟ್ ಹಾಕಿಸಿ ಊರ ಬಾಗಿಲಲ್ಲಿ ಹಾಕಿದ್ದರು,ಅವರಿಗೆ ನಾವೇನು ಕಮ್ಮಿ ಎಂದುಕೊಂಡ ನಮ್ಮ ಬಳಗ ಹಿಂದೆಂದೂ ಕಂಡರಿಯದ ೫೦ ಜನರನ್ನೊಳಗೊಂಡ ದೊಡ್ಡ ಬ್ಯಾನರನ್ನೇ ಕಟ್ಟಿರೋದು ನಮ್ ಹುಡುಗರ ಬಗ್ಗೆ ಹೇಳುತ್ತೆ..
ನಮ್ ಹುಡುಗರು ಎಷ್ಟೇ ಪೋಲಿ-ಪಟಾಲಂ ಗಳಾದರೂ ದೇವರ ವಿಷಯ ಬಂದರೆ ಮಾತ್ರ ತುಂಬಾ ಭಯ ಭಕ್ತಿಯಿಂದ ಕೆಲಸದಲ್ಲಿ ತೊಡಗಿಕೊಳ್ಳುತ್ತಾರೆ..
ಗಣಪತಿ ಕೂರಿಸುತ್ತೇವೆ ಎಂದುಕೊಂಡು ನಾವು ಮಾಡಿಕೊಳ್ಳುವ ಗಲಾಟೆ ನನೆದರೆ ನಮ್ ಏರಿಯಾಗೆ ಬರುವ ಗಣಪ ಅದೆಷ್ಟು ಪಾಪ ಮಾಡಿದೆಯೊ ಎನಿಸುತ್ತದೆ..


~.

7 ಕಾಮೆಂಟ್‌ಗಳು:

sunaath ಹೇಳಿದರು...

ಗಣಪತಿ ಹಬ್ಬದ ಶುಭಾಶಯಗಳು.
ಭಿನ್ನವಾದ ಗಣೇಶಮೂರ್ತಿಗಳನ್ನು ನೋಡಿ ವ್ಯಥೆಯಾಯಿತು.

RAGHU ಹೇಳಿದರು...

Good post..peoples have to aware of this....

prabhamani nagaraja ಹೇಳಿದರು...

ಹಬ್ಬದ ಹೆಸರಿನಲ್ಲಿ ಯುವಜನತೆಯ ಹುಚ್ಚಾಟಕ್ಕೆ ಹಿಡಿದ ಕನ್ನಡಿಯ೦ತಿದೆ ನಿಮ್ಮ ಲೇಖನ. ಭಿನ್ನವಾಗಿರುವ ಮೂರ್ತಿ ಗಳನ್ನು ನೋಡಿ 'ಅಯ್ಯೋ' ಎನಿಸಿತು.

ಅನಂತ್ ರಾಜ್ ಹೇಳಿದರು...

ಗಣಪತಿ ಹಬ್ಬದ ಶುಭಾಶಯಗಳು. ಭಿನ್ನ ಗಣಪನ ಮೂರ್ತಿಗಳನ್ನು ನೋಡಿ ಮನಸ್ಸಿಗೆ ನೋವಾಯಿತು. ಯುವಜನತೆಯ ಹುಚ್ಚಾಟದ ದರ್ಶನವಾಯಿತು. ಗಣಪನೇ ಒಳ್ಳೆಯ ಬುದ್ಧಿಯನ್ನು ಕೊಡಬೇಕು ಅಷ್ಟೆ..

ಅನ೦ತ್

ಕಲರವ ಹೇಳಿದರು...

kaleda varshada
vighneshvarana
sthitige tumbaa
duhkkhavaaitu.

Subrahmanya ಹೇಳಿದರು...

ಗಣಪತಿಯ ದುರವಸ್ಥೆಯನ್ನು ಕಂಡು ಬೇಸರವಾಯಿತು !

ವಿಚಲಿತ... ಹೇಳಿದರು...

ಪ್ರತಿಕ್ರಿಯಿಸಿದ ಎಲ್ಲರಿಗೂ ಧನ್ಯವಾದಗಳು..

Related Posts Plugin for WordPress, Blogger...